Kontabiliteti për IT dhe Freelancer — Guida e Plotë

Sektori IT dhe freelancer-ët që punojnë me klientë ndërkombëtarë gëzojnë ndër avantazhet tatimore më të mira në Shqipëri. Kombinimi i normës 0% të tatimit mbi fitimin, TVSH-së zero për eksport shërbimesh, dhe kostove minimale të sigurimeve e bën Shqipërinë ndër vendet më tërheqëse fiskale në Europë për profesionistët e teknologjisë.

Por ka rregulla që duhen njohur

Avantazhet vijnë me kushte specifike. Rregulli 80% i Ligjit 29/2023 mund të riklasifikojë freelancer-in si punonjës nëse nuk strukturohet saktë. Zgjedhja e gabuar midis Person Fizik dhe SH.P.K mund të kushtojë qindra mijëra lekë në vit. Dhe mospërmbushja e detyrës së fiskalizimit sjell gjoba edhe nëse tatimi efektiv është zero.

Ky udhëzues mbulon çdo aspekt kontabël dhe tatimor për IT-istët dhe freelancer-ët shqiptarë — me shembuj praktikë dhe numra konkretë.

Zgjedhja midis Person Fizik (PF) dhe SH.P.K-së është vendimi i parë dhe më i rëndësishëm tatimor për çdo profesionist IT. Çdo formë ka avantazhe dhe kufizime specifike.

Person Fizik — kur është zgjedhja e duhur

• 0% tatim fitimi për qarkullim deri 14 milionë ALL (rreth 140,000 EUR) — aktiv deri 31.12.2029 sipas normës 0%.
• Regjistrimi i thjeshtë: 1 ditë pune pranë QKB, ose online përmes e-Albania.
• Kosto minimale: sigurime shoqërore rreth 14,900 ALL/muaj, zero tatim fitimi, zero TVSH për eksport.
• Kufizimi: përgjegjësi e pakufizuar me pasurinë personale. Rregulli 80% aplikohet për PF.

SH.P.K — kur ia vlen kalimi

• Tatim fitimi 15% (norma e reduktuar 5% për kompani software-i skadoi më 31.12.2025; tani 15%). Dividendi tatohet 8% shtesë.
• Përgjegjësi e kufizuar: rreziku financiar kufizohet në kapitalin e investuar (minimum 100 lekë).
• Rregulli 80% nuk aplikohet për shoqëri tregtare — vetëm për persona fizikë.
• Kosto më e lartë: kontabilitet i detyrueshëm më i detajuar, deklarata shtesë, tarifa regjistrimi.

Rekomandimi im praktik

Nëse të ardhurat tuaja vjetore janë nën 14 milionë ALL dhe punoni me klientë jorezidentë, Person Fizik është zgjedhja optimale — 0% tatim fitimi, zero TVSH, kosto minimale sigurimesh. Nëse të ardhurat tejkalojnë këtë prag, ose punoni me klientë shqiptarë që aktivizojnë rregullin 80%, ose keni nevojë për mbrojtje pasurie, SH.P.K ofron strukturë më të sigurt. Na kontaktoni për analizë personalizuar.

Shumica e profesionistëve IT në Shqipëri punojnë me klientë jashtë — kompani në SHBA, Gjermani, Mbretëri të Bashkuar, dhe vende të tjera. Faturimi ndërkombëtar ka rregulla specifike që duhen ndjekur.

Faturimi për klientë jorezidentë

Shërbimet e ofruara për kompani pa seli të përhershme në Shqipëri konsiderohen eksport shërbimesh sipas Nenit 53 të ligjit të TVSH-së. Kjo do të thotë:

• TVSH 0% mbi shërbimet e eksportuara — edhe nëse jeni të regjistruar për TVSH.
• Fatura në valutë të huaj. Mund të faturoni në EUR, USD, ose çdo valutë tjetër. Konvertimi në ALL bëhet me kursin e Bankës së Shqipërisë në datën e faturës për qëllime kontabël.
• Faturë e fiskalizuar. Edhe për klientë të huaj, fatura duhet të lëshohet përmes sistemit fiskal dhe të marrë kodin NIVF.

Kur duhet regjistrimi për TVSH

Nëse qarkullimi juaj vjetor kalon 10 milionë ALL (~103,000 EUR), regjistrimi për TVSH bëhet i detyrueshëm brenda 15 ditëve. Kjo nuk ndryshon trajtimin — vazhdoni të faturoni me 0% për klientë jashtë. Por deklaroni TVSH-në mujore (me shumë zero) deri më datën 14 të çdo muaji.

TVSH mbi shërbime dixhitale nga jashtë

Nëse blini shërbime dixhitale nga kompani të huaja (cloud hosting, softuer, reklama online), mund të aplikohet TVSH-ja me mekanizmin e kundërt (reverse charge) — ju vetë-llogarisni TVSH-në 20% si blerës. Kjo TVSH kreditohet menjëherë nëse biznesi juaj është i regjistruar për TVSH.

Nga 1 janari 2024 deri më 31 dhjetor 2029, të gjithë tregtarët individualë dhe vetëpunësuarit me të ardhura bruto vjetore deri 14 milionë ALL (rreth 140,000 EUR) përfitojnë 0% tatim fitimi. Kjo normë u rikthye pas Vendimit 52/2024 të Gjykatës Kushtetuese, e cila rrëzoi VKM 753/2023 që përjashtonte profesionet e lira.

Kush përfiton

• Zhvillues software, dizajnerë, konsulentë IT, përkthyes, copywriter — çdo profesion i lirë.
• Tregtarë individualë me qarkullim nën 14 milionë ALL.
• Nuk ka përjashtim sipas profesionit — vendimi i Gjykatës Kushtetuese e eliminoi plotësisht.

Kushtet praktike

1. Regjistrim aktiv si Person Fizik pranë QKB-së.
2. Qarkullim bruto nën 14 milionë ALL/vit. Pas kalimit të pragut, tatimi mbi fitimin bëhet 15% mbi fitimin neto.
3. Faturim i rregullt fiskal. Çdo e ardhur duhet të regjistrohet me faturë fiskale.
4. Deklarim i rregullt i DIVA-s. Edhe me 0% tatim, dorëzimi i deklaratës vjetore mbetet i detyrueshëm.

Kurthi kryesor: kalimi i pragut

Nëse gjatë vitit arrini 14 milionë ALL, tatimi 15% aplikohet mbi gjithë fitimin e vitit, jo vetëm mbi diferencën. Kjo do të thotë se diferenca midis 13.9 milionë ALL (0% tatim) dhe 14.1 milionë ALL (15% tatim mbi gjithë fitimin) është dramatike. Ne monitorojmë qarkullimin e klientëve çdo tremujor dhe këshillojmë strategji para se të afrohet pragu.

Profesionistët IT kanë kategori specifike shpenzimesh të zbritshme që duhet të dokumentohen saktë:

Shpenzimet tipike të zbritshme

• Pajisje teknologjike: laptop, monitor, tastierë, kufje — amortizohen me 25% në vit ose zbriten plotësisht nëse vlera është nën 150,000 ALL.
• Softuer dhe abone: licenca software (IDE, cloud, SaaS), hosting, domain — zbriten plotësisht si shpenzim periudhe.
• Internet dhe telefoni: abonimi mujor, nëse përdoret për punë, zbritet plotësisht (ose proporcionalisht nëse edhe personal).
• Trajnime dhe çertifikime: kurse profesionale, çertifikime teknologjike — zbriten si shpenzim biznesi.
• Zyra ose co-working: qiraja e zyrës ose abonimi i hapësirës co-working zbritet plotësisht.

Pronësia intelektuale

Nëse krijoni softuer, aplikacione, ose produkte dixhitale, kostoja e zhvillimit mund të kapitalizohet si aktiv jo-material dhe të amortizohet. Për Person Fizik me normë 0%, kjo ka rëndësi më pak tatimore por bëhet thelbësore nëse kaloni pragun e 14 milionë ALL ose nëse kaloni në SH.P.K. Ne këshillojmë strukturimin e duhur nga fillimi.

Regjimi i thjeshtuar vs analitik

Freelancer-ët me qarkullim nën 10 milionë ALL mund të zgjedhin regjimin e thjeshtuar: zbritje automatike 30% mbi të ardhurat bruto, pa nevojë për fatura analitike shpenzimesh. Nëse shpenzimet tuaja reale janë mbi 30%, regjimi analitik është më i favorshëm. Ne llogarisim të dy skenarët dhe zgjedhim optimalen.

Rregulli 80% i Ligjit 29/2023 është rreziku kryesor tatimor për freelancer-ët IT. Nëse 80% ose më shumë e të ardhurave tuaja vjetore vjen nga një klient i vetëm, DPT-ja mund t'i riklasifikojë si të ardhura nga punësimi, duke eliminuar normën 0% dhe duke ju detyruar të paguani tatim page deri 23%.

Mbrojtja kryesore: klienti jorezident

Rregulli 80% nuk aplikohet kur klienti është jorezident, do të thotë kompani pa seli të përhershme në Shqipëri. Nëse punoni 100% për një startup në San Francisko, mbroheni plotësisht pavarësisht përqindjes. Verifikoni që klienti nuk ka prezencë fizike në Shqipëri përmes kërkimit në QKB.

Vetëdeklarimi sipas Ligjit 81/2025

Ligji 81/2025, datë 11.12.2025, shton në Nenin 12/1/ç mundësinë e vetëdeklarimit: edhe kur rregulli 80% aplikohet me klient rezident, mund të dorëzoni Deklaratën e Statusit të Vetëpunësuarit. Kujdes me pritshmërinë: ajo nuk e konfirmon statusin, e paraqet atë. Provat që peshojnë janë NIPT aktiv, faturim fiskal, kontratë shërbimi e jo punësimi, kontroll real mbi orarin e metodën, dhe shpenzime biznesi të dokumentuara.

Puna remote për kompani të huaja

Nëse punoni remote nga Shqipëria për kompani të huaja, statusi juaj tatimor varet nga rezidenca tatimore: nëse qëndroni mbi 183 ditë në vit në Shqipëri, jeni rezident tatimor shqiptar dhe deklaroni të gjitha të ardhurat këtu. Lexoni artikullin tonë mbi tatimet për nomadët dixhitalë për detaje. Avantazhi: normën 0% e gëzoni njësoj. Detyrimi: duhet të keni NIPT aktiv, të faturoni çdo pagesë, dhe të deklaroni DIVA-n vjetore.

Na kontaktoni për konsultë me Valbonën (€30, kreditohet) ku analizojmë strukturën tuaj aktuale dhe identifikojmë mundësi kursimi.